八月花 (Moved) New Location

好少去又一城，但為咗遷就友人，所以揀咗喺又一城食飯。唔想食西餐即時收窄範圍，咁啱某食評話恆生卡有六折，就決定食呢間八月花。過半數先可以入座，用餐時間 1.5 小時（以中餐廳嚟講都幾 O 嘴）。適逢呢兩個月係慶祝母親節同父親節嘅旺季，我都明做生意梗係想賺多啲嘅，睇勻成疊餐牌都唔見恆生，就問侍應，原來呢日變咗 “secret” menu。以下菜名取自銀行網站。海蜇燒味雙拼盤 — 以套餐嚟講真係好大方，竟然俾嫩滑髀位，海蜇粗身又大碟。黑松露醬四角豆炒蝦仁 — 網站寫黑松露醬四角豆，不過而家 XO 醬翠玉瓜炒蝦仁呢個配搭感覺正常啲。蟹肉燴芙蓉 — 大概分到六碗左右，龍蝦湯調味啱啱好，唔似平時有啲餐廳整得偏鹹。清蒸花尾躉斑 — 蒸過龍，所以肉頗嚡，不過我估寧可確保熟透，都唔想俾客退番入廚房再蒸。粥水藜麥蟲草花浸翡翠 — 面嘅金菇芡份量真係幾多，但有人一開始夾太多囉，結果最後變食草蛋白岩米桶仔飯 — 套餐份量唔夠飽，所以另外嗌飯。見白飯都十幾蚊，不如試吓一桶飯（每位三十幾蚊）。份量應該比一碗多，但味道真係無乜特別，純粹因為岩米多咗啲口感。如果話用原價 $1200我就唔會食喇，但而家六折算係咁啦。