鼎尚棋哥燒鵝湯館 (Closed)

鼎爺開嘅餐廳，位於戲曲中心入面，餐廳裝修充滿懷舊風味；而且播放着懷舊歌曲，另有一番風味。當然要試吓呢度主打嘅荔枝柴燒鵝，燒鵝味幾香，有柴燒過嘅香味，鵝味香，配飯一流。桂香切雞：雞皮金黃，而且雞肉嫩滑。有雞油香味，揀咗配瀨粉就唔會太油膩。脆皮燒腩肉，帶有燒肉鹹香，而且面上脆皮真係卜卜趣，好邪惡！賣相味道都唔錯。燉湯叫咗椰皇燉嫩雞，充滿椰皇香，而且帶點清清嘅雞味，非常滋潤。椰菜瑤柱海皇湯，充滿鮮味，非常足料。好鍾意呢度嘅燉湯夠火喉。呢度嘅燉湯仲可以外賣非常方便。仲叫咗呢度嘅奶茶同雞骨草，兩樣飲品都幾好飲，鍾意港式奶茶茶味夠濃。