添好運點心專門店

Open Now

Now Closed

老婆約咗兄弟姊妹飲茶，一大班人都話想試下呢間米芝蓮級數嘅點心專門店，店舖位於商埸地下近戲院位置，地鐵一出就係商埸，唔怕日曬雨淋，超方便。去到12點鐘之前，所以都即刻有位，點心紙得一大張，一眼睇哂，人多嘅好處就係可以試多幾款點心，茶位就要每位5元， 都幾化算！酥皮焗叉燒包就必試，包面係一層脆脆嘅墨西哥包皮，叉燒餡料多汁飽滿，一試難忘！豉油皇炒麵夠乾身，唔油膩，味道剛剛好、炸兩，腸粉皮嫩滑，入面嘅油炸鬼仲好脆身，正！至於碟韭王鮮蝦腸，蝦肉爽及鮮，蝦嘅份量都算多，唔錯！陳皮牛肉球唔算大粒，冇乜陳皮香味，個人覺得較普通、潮州粉果冇試到不作評論、鮑汁鳳爪，鮑汁都夠，有鮑汁味，鳳爪軟淋度啱啱好，個人覺得大過淋反而冇咁好，要有啲咬口先至正！家鄉咸水角就外皮唔夠脆，只係一般水準！晶瑩鮮蝦餃（唔記得影相），蝦餃皮真係做到晶瑩剔透，入面嘅蝦好爽口，夠鮮味，一啖一隻夠哂爽！