M3 Italian (Closed)

心血來潮想食西餐，平日常常經過都未有機會試，今日諗起，二話不說便揸車來，帶埋阿女，一於一家三口浪漫下。冇book位，早點來到，好彩仲有幾張細枱，其他已經有食客預留座位。呢度嘅氣氛唔錯，入門口位置擺放咗許多不同類型的酒，餐廳內環境尚算闊落，感覺舒服。老公想飲湯，叫咗個是日餐湯~忌廉甘筍湯，好香滑，唔會太甜。阿女肚餓，揸主意叫咗個意大利飯同意大利粉。香煎鵝肝黑松露意大利飯，黑松露真係好香，鵝肝好大塊，入口即溶，豐富嘅脂肪感覺好正，再加上飯煮得軟硬度適中，味道非常可口，愈食愈好味。龍蝦汁蝦肉意大利粉，上菜時聞到好香煎蝦嘅味，這個汁做得不錯，意粉爽口彈牙。烤美國安格斯肉眼扒(10oz) 伴燒新薯及紅酒燒汁，要求五成熟，切開見到嫩嫩粉紅色，真的十分可愛，豐富肉汁，牛肉味香濃。香橙冰紅茶，新鮮橙味，清甜好飲。凍蝶豆花檸檬茶，顏色好特別好靚，最初係藍色，篤下啲檸檬變咗紫色，落咗少少糖水，味道唔算突出。