Sodam Chicken (Closed)

我地大概六點鐘到，店內無咩人，柔和既燈光配合jazz style既韓文歌比人好chill既感覺。因為平日去開既韓國餐廳都好嘈，音樂又播得勁大聲，連朋友講野都聽唔到，所以相比之下呢到既氣氛好好多。首先要讚既係份量十足，四個女仔叫三樣食物都食得好飽。先講下柚子檸檬炸雞，一舊雞起碼有一個手掌咁大，外脆內軟，肉質鮮美，雞味同柚子味都幾夾。柚子味道香甜清新，中和左炸雞既油膩感。第二樣係水冷麵，麵條好有質感，唔會太淋，吸哂個湯既精華。另外配菜都好好味！有泡菜同雞蛋。係炎炎夏日食番碗水冷麵，仲爽過涼冷氣！最後我地叫左煙燻烤雞，聞起上黎有bbq既味道，食起上黎有德國鹹豬手既味道，幾新穎既一道菜。味道濃郁，雞肉唔會太硬唔會太乾，比較適合重口味既人。整體黎講，作為韓國炸雞流入香港既先鋒，sodam chicken既水準都keep得幾好，唔會輸蝕於近年新興既韓國炸雞餐廳。而且食物花樣多變，間唔中就會出下新菜式，令人食指大動。下次去一定要試下三重雞同芝士鍋！