有囍 (Closed)

同朋友們行完街之後仲諗緊食咩嘅時候,經過依間主推東南亞菜式有齊晒星馬泰越菜嘅餐廳,就決定一於試一試。先食個泰式頭盤,份量比預期中嘅多,貌似簡單,食落有驚喜。柚子配上酸酸甜甜嘅醬汁加上乾蔥點綴,香口又開胃。越南嘅代表作牛油雞翼,外皮香口酥脆帶有牛油香味,咬落肉嫩多汁,不過如果蒜香味再重D就更好。冬陰公味道比平時飲開嘅較為甜少少,香茅香氣十足。海鮮分量亦唔手軟,有青口,魚,蟹柳,蝦同魷魚。感覺誠意十足。平時食嘅蘿蔔糕不外乎蒸同煎,但新加坡嘅炒蘿蔔糕就令人有意想不到嘅效果,蘿蔔糕外皮煎得香脆再加上醬油炒,味道偏甜啱晒重口味嘅我,值得一試。金邊粉望落較為濕潤,不過依然充滿鑊氣,甜,酸,鹹嘅味道平均,大蝦亦夠爽口彈牙。再飲番杯充滿東南亞特色嘅椰子沙冰,椰味香氣十足,夠晒清新可以話係成餐飯嘅點綴。