一虎

Open Now

Now Closed

餐廳：一虎地點：灣仔廈門街菜式：日式拉麵餐牌：有拉麵6款，飯一款，餃子一款，飲品。另外都有其他口味拉麵，例如期間限定口味。可以剔紙選擇麵既種類同硬度，湯既香油，配料要唔要，加料或者加麵。一虎特選 $143一虎特選賣相唔錯，係包含所有配菜既拉麵，非常豐富。叉燒5片，好薄切，完全唔韌，又唔會太肥，好有豬味。味付蛋一隻，非常入味，呢度係原隻上，無切開，入面軟淋淋好滑溜，味道偏濃。海苔4大片，浸左落湯更好味。味付筍同木耳絲爽脆，份量好多。加上新鮮蔥花同一小pat辣蘿蔔蓉。蔬菜份量真係好足！一虎個湯底係豬骨湯，好清，唔會太濃或者太油，我地叫左走香油。個麵我揀左幼麵同正常硬度，個人覺得都可以，下次希望可以試試粗麵。赤虎特選 $149赤虎特選配料同一虎特選一樣。赤虎係大阪人氣激辛口味，個湯底呈紅色，味道果然係辣，都幾辣架。煎餃子 $48煎餃子一客六件。餃子皮煎得少少脆而滑溜，入面有豬肉同蔬菜餡。食埋餃子真係大大滿足。紅茶花伝檸檬茶 $17烏龍茶 $17紅茶花伝檸檬茶同烏龍茶都係支裝，衛生方便，仲有飲管。枱面都有冰水自己斟。枱頭有辣芽菜，鹹菜同紅姜。星期日下午兩點幾都要等位，非常旺場。