一幻拉麵 (Closed)

記得兩年前響北海道食過一幻之後，念念不忘，因為個蝦湯底真係太濃郁太鮮甜，可惜一直無機會再去北海道。後來聽聞一幻響香港開咗分店，即刻想去挑戰下。不過店舖位置唔太就腳，唔近地鐵站，反而係響合和中心附近，於是等到今次，響附近做完嘢，終於可以嚟試一試。香港拉麵舖眾多，但以蝦湯為主打又做得好嘅，大概都係得十間八間。挾著過江龍嘅名氣，一幻能否跑出？食嘅當晚已經係八點幾，而且熱潮已過，加上一個人去食，基本上唔洗等位，就坐咗響面壁思過位。餐廳裝修幾靚，木系為主，加上天花板紅色拱形裝飾，第一印象唔錯。拉麵清一色每碗$88，過江龍加上港島區嚟講算係合理價錢。而由於湯底無論係淨蝦湯，或者溝豬骨湯，都係一樣價錢，咁當然係叫淨蝦湯啦，因為呢個先係嚟呢度嘅原因嘛。當晚叫咗呢個味噌蝦湯幼麵，的確幾有蝦嘅鮮味同香味，但整體偏鹹，食到一半開始尤其明顯。至於麵質就中規中矩，都幾掛湯，硬度唔可以選擇，但都係滿意嘅，唔會太軟或者太硬。至於有唔少人認為個湯比較油，可能本人鍾意食重口味，所以覺得問題不大。至於配料就比較少，主要只係有半隻蛋同一塊叉燒。蛋就做到流心效果，合格有餘。叉燒呢，其實本人就無咩研究，但唔會話太「鞋」，亦有肉