Cafe Paradise (Closed)

米白色嘅湯身主要由忌廉同薯泥混合而成，入口幼滑，而夾雜嚮稠湯之中嘅薯仔粒同蘑菇粒，為原本口感單調嘅湯身增添咗一重層次感。煙肉粒嘅加入，同原本香甜嘅忌廉味好夾，甜中帶鹹，起咗提鮮嘅效果。味道總括嚟講，夠哂濃郁，但作為主菜前嘅餐湯，就未必人人都鍾意濃湯，有人可能會偏向選擇清澈見底嘅清湯，而我就覺得，濃湯對味蕾而言係一種熱身，透過刺激，喚醒返味蕾嘅敏銳感，等佢可以為嚟緊嘅主菜做好準備。邪惡嘅芝麻雞翼，表皮整到金紅鬆脆，再灑上粒粒白芝麻，除咗可以增添香味之外，仲可以加強口感，淨係外表已經夠哂呃like。 咬落就同想像中一樣咁滋味，內層肌肉質感唔會太乾，而且仲好嫩滑同入味。如果可以食多幾隻就好喇⋯⋯ 呢塊牛扒嘅最大問題唔係面積細，而係太薄，因為牛扒嘅最佳厚度應該要1吋左右，咁樣煎出嚟嘅牛扒，咬落先會有層次感，而且亦都更容易將肉汁鎖緊。相反太薄就會失去咗牛扒應有嘅質感，同食普通牛肉無分別。 不過好彩嘅係，我食嘅時候無覺得呢塊牛扒好乾，而且仲有肉汁滲出，調味亦都算出色，但始終牛味唔重，同埋口感唔夠豐富，稱唔上頂級，只可以算係中等質素。