胡爐 (Closed)

我地兩公婆都好鍾意打邊爐，朋友介紹銅鑼灣胡爐。由時代廣場行過黎，唔洗5分鐘就到。我地於兩星期前book位，準時1830到，職員安排二人卡位俾我地，私隠度高，每張枱都有屏風隔住。而且側邊仲有一張移動式既長枱方便放置食物，凳下可以打開並且可以放外套，咁樣件褸就唔會咁大陣味，成件事好貼心呀!醬料(每位$22)，有8款調味任你落。我地嗌左個鮮椰青雞鍋($298)、頂級霜降牛柳粒($188)、鴨血($78)、蔬菜拼盤小($58)、稻庭烏冬($48)、生力($48)。好快就黎左個鍋先，職員即場煮，首先炒一炒d雞同椰條，加酒燴一燴佢，用火燒一燒罯蓋煮一陣。然後，職員倒原隻椰青水落鍋，再加湯，待滾熱出煙就叫我地可以先飲湯。我同老公先來一人一碗湯，個份清甜令我再要倒第二碗湯飲!十分欣賞個湯!頂級霜降牛柳粒爽口有牛味，不痴牙，邊口有筋位彈牙、有咬感!鴨血新鮮冇腥味，外面煙韌內裡軟滑。意想不到的是蔬菜拼盤會有豆苗，仲要數量唔少!出面通常都只是生菜，油麥菜。食完捧住個肚走，我下次會再黎幫襯個鮮椰青雞湯!!!