夏麵館 (寶石大廈) (Closed)

今晚同親戚晚飯，有人想食上海野，又有人想食川菜，阿姨發板就同我哋嚟咗呢度食。叫咗個招牌水煮魚，睇個樣都好正宗，裏面有嘅唔係粉條係類似雞絲粉皮嘅粉皮，比較軟同薄，但都係一樣好滑口。酸辣之中唔會好多花椒八角，魚肉份量適中，質素OK。我本身鍾意食鱔又怕多骨，最鍾意食韭黃炒鱔絲。雖然餸汁多咗啲，但鱔肉新鮮彈牙起骨起得乾淨同埋份量好多，韭黃亦新鮮冇渣，呢個係最好食。仲有濃湯滑津白、老上海炒麵、原味小籠包，每樣水準預期之中，賣單竟然只係$400鬆啲。後尾先至發現原來佢哋有期間限定蟹粉菜式，喺指定平台限時優惠每人都係$200多少少，三五個人晚飯價錢來講，性價比係幾高。