勇記海南雞 (隆基大樓)

Open Now

Now Closed

最近工作量大，忙裡偷閒地拎咗日假，於是約朋友一齊到勇記海南雞探店。今次己是第3次探店，前2次都食唔到，今次終於食到。我同朋友3點09分到，前面約有6-7人排隊，而等外賣嘅都有4-5人，果然好野食係多人幫襯。等左約10分鐘左右，終於輪到我，店內空間唔算好大，但環境算乾淨，我地被安排在靠墙壁位置。拎起餐牌，紙質印刷幾精美同埋都好新，我叫左海南雞laksa朋友叫左海南雞油飯，原本想叫雞湯但已經沽清，唯有試吓花茶。等左5-8鐘左右，朋友嘅海南雞油飯到咗，個碟幾大😂但份量略少，如果係男士食可能會唔夠飽，隔左一陣我嘅海南雞laksa都到咗，份量比海南雞油飯大而且俾咗雞髀位我。雞皮好爽好彈，皮下脂肪唔厚，食多2件都唔會有罪惡感，雞肉食落好滑，雞味亦好重唯美中不足嘅係今日食嘅雞冇啫喱狀在雞皮下（見好多人都話有），油飯d飯粒粒分明煮得啱啱好，金黃色嘅飯上面舖左少少炸蒜令個油飯再添加香味。laksa黎講，個湯底属於偏甜少少嘅，比較重奶香味，而佢用嘅米線同譚仔嘅好唔同係偏幼身但有少少🤏煙韌嘅感覺，係好食嘅。而我覺得最驚係嘅係個醬，真係好好食，食到香茅同青檸味，有少少🤏辣味，好野味。