Green Orange

今日放工同朋友去咗上環嘅西餐廳 Green Orange 食晚餐，由於係樓上餐廳，所以相對比較寧靜，亦都坐得舒服啲。我哋叫咗個二人晚餐，首先有刺身帶子沙律，鮮甜嘅帶子刺身上面有啲三文魚子，仲有少少青瓜粒同芥末，清新得嚟又開胃。前菜我哋揀咗極盡邪惡嘅雞肝醬拼盤，除咗有又滑又香濃嘅雞肝醬，仲有配咗黑松露嘅芝士同salami，配烘過嘅餐包一流，雞肝醬上面有一層雞油，非常香滑而且雞味濃郁。拼盤仲有酸瓜，食完之後可以幫助去油膩感。餐湯有甜甜地嘅忌廉南瓜湯。主菜我哋揀咗美國頂級牛柳裙邊，medium 嘅牛柳燒到啱啱好，外面有焦香味，入面仍然粉嫩。上面鋪咗Parsley，食落有淡淡的香草味同黑醋調味。第二度主菜係黑松露意大利飯，黑松露香氣撲鼻，意大利飯入面夾雜住雜菇，食落爽口 juicy。甜品我揀咗意式奶凍，熱情果醬同生果酸酸甜甜，好配合奶凍。朋友叫咗啤梨蘋果金寶，crumble 夠脆，同雲呢拿雪糕好夾，仲食到啤梨嘅果肉。飲品就揀咗prosecco，夠消暑味道又唔會太搶。