牡丹金閣 (Closed)

成日覺得元朗區飲茶平過其他地區好多，疫情未爆前，同屋企人黎交通廣場間牡丹金閣，午市正常價位，下午茶就超平。侍應推住特價點心出黎，要左炒銀針粉同煎腸粉，銀針粉幾爽口，煎腸粉煎得香口，勁夠豉油正喎。叉燒包熱辣辣夠鬆軟，餡料甜甜地幾好味。叉燒酥個酥皮好香脆，而且好大條，一條飽左。春卷即叫即炸，食左幾次都係熱辣辣的，餡料有豬肉蔬菜等，鹹鹹地咁囉。黑糖蜂巢糕，軟綿綿又煙煙韌韌，好香嘅黑糖味又不死甜，必食之選！點左燒味部嘅燒腩仔米粉，半肥瘦，皮脆鹹香，好好味噃，伴碟嘅蘿蔔好鮮甜無渣，哈哈，連配菜都好味。米粉就普普通通啦，無乜味嘅清湯底。藥膳雞腳勁香藥材味，湯頭超濃，雞腳煲了不少時間，軟身入味，好味到一滴湯都飲晒。鮑汁雞腳，一碗好似有六七隻？同勁多花生，個汁鹹鹹甜甜又幾好味，呢碟個雞腳同樣晒味好正。菠蘿生炒骨？定咕嚕肉？哈哈，唔識分。甜甜酸酸的醬汁好開胃，啖啖肉同鮮菠蘿，好味。豉椒排骨炒河，下午茶份量意外地大碟，好多排骨，醬汁調得好味，河粉不黏口，炒得好正。仲有乾炒肉片河，炒得好香口呀，肉片仲多過粉，點搞呀？哈哈。每次都點好多，但人均都六十零蚊，好抵食呀～