金滿庭京川滬菜館 (時代廣場) (Closed)

平時我都會於晚飯時段去幫襯銅鑼灣嘅金滿庭, 鍾意佢啲茶夠靚同食物質素有保証, 雖然要等好耐位, 但都照排隊可也。上星期六, 大約下午四點, 諗住去食佢嘅下午茶餐; 佢門口個牌都係寫下午茶由3至5點, 但你一坐落就話你知last order 係4點15分, 坐到4點45分就要清場; 唉! 既然想賺埋下午茶市嘅客, 唔該你哋啲營業時間就有啲彈性, 唔想做到5點, 就唔好喺門口寫營業到5點; 人哋排隊都排都4點先至有位入, 一坐低就滾水碌腳咁趕嚟落order同食, 仲慘過去快餐店。仲有, 係啲食物, 雖然明知份量係會少啲 (因為價錢相對算平咗), 但都唔好係和暖, 啲酸辣湯係暖嘅, 回鍋肉粗炒好多油 (已叫少油); 但最忟係啲茶, 揭開壼蓋, 見到啲茶葉係已經滿滿半壼, 即係不停加添翻沖, 無哂茶味嘅萬年茶, 當日我兩個人去, 只有一個叫套餐, 另外一個係散叫其它食物, 所以佢都收咗我$10茶錢, 但都要飲呢啲萬年茶; 如果佢下午茶時段嘅出品同晚市差咁遠, 幾平我都唔會再去;