鳳城酒家 (Closed)

試過喺幾間唔同嘅鳳城食晚飯，始終覺得太子店嘅食材比較新鮮，廚師手藝較佳，呢日喺附近睇完嘢，於是就過嚟食飯。上次喺度見到枱枱都叫乳豬，無奈已叫咗餸，所以就無試到，呢晚一心諗住會一會佢，點知已經賣晒，當堂有啲失望，唯有下次再嚟試過啦! 呢餐見咗兩個餸，一個係菠蘿生炒骨，另一個係涼瓜炒鱔球。菠蘿生炒骨味道普普通通，最特別係加咗啲薑粒一齊炒，有解滯作用。涼瓜炒鱔球就真係食到叮一聲 ，涼瓜好爽脆，但又唔苦，我本來係涼瓜控，真係食到唔停口，鱔球啖啖肉，雖然有少少細骨，但都可以接受，加上呢碟餸用豆豉，蒜片，薑同陳皮一齊爆炒，不但香味十足，仲可以辟去魚腥味，呢兩個餸送白飯，簡直係絕配。下次我會再返嚟叫返碟人氣乳豬，一試龍與鳳。