一杯屋 (Closed)

見OpenRice上面啲人都有寫話上菜上得慢，但冇諗過慢嘅程度係每二十分鐘一道餸。8點鐘入座10點鐘就已經要走，基本丄無可能食得晒，嚟咗兩三碟嘢已經last order...八點鐘第一round叫嘅鰻魚飯，最終9:30先到，侍應解釋話因為條鰻魚要燒，但係好明顯係來貨跟住翻熱嗰種...飯仲要係硬嘅又唔熱，完全唔知想點。之後又有一碟係燒牛小排，嚟到真係呆咗，成碟基本上得肥膏。侍應仲竟然解釋話嗰啲係筋，食落會有口感？！雖然之後有換過碟新嘅嚟，但其實真係唔係特別好食。仲有嗌其他串燒同埋蟹蓋，全部都好鹹，份量又細，價錢又貴。埋單人均三百幾蚊，食完好似冇食過嘢一樣， 成晚就係坐喺度兩個鐘捱肚餓同埋瘋狂吹佢單。果到成間餐廳嘅客全部都係等嘢食等到炆憎，廚房唔夠人就唔好接咁多台客，簡直係貼錢買難受，貼錢俾我去食我都唔會再去食。從來未試過去間餐廳係會食得咁無奈同辛苦。