Burger Bar (Closed)

我請個friend睇完戲，佢話請番我食野。我本來打算食炸魚薯條，不過又搵唔到。行過LKF一間漢堡店，望下menu，除左牛漢堡，仲有魚漢堡，食唔到炸魚薯條，一於食番個魚包補數。Order左牛同魚漢堡，同埋炸蝦。炸蝦先到，味道都算唔錯，不過d蝦炸到Over左，如果唔係會仲正。 呢道主打嘅手打安格斯牛肉漢堡，味道的確唔錯，牛肉多汁而肉質鬆軟，配料有洋蔥、芝士、生菜、番茄，份量十足。不過印象最深刻，都係原條炸魚嘅魚堡! 原條炸魚上檯好壯觀，漢堡包皮好脆，炸魚配合特製羅勒醬，美味程度比起牛肉扒漢堡，有過之而無不及。仲有檯上有提供膠手套，相當貼心，因為有手套，連我個女仔friend都不介意用手食咁大個包。