酥妃皇后 (Closed)

最近幾次嚟東港城發現開咗一間都幾多人排隊嘅"酥妃皇后",睇佢門面好似走高檔路線咁,主打都係賣牛角酥同埋鮮奶蛋撻,所以一心就諗住帶阿肥過嚟試下,因為佢係牛角酥嘅粉絲,無論去到邊間麵包舖,佢都會買牛角酥。 我哋大約晏晝三點零嚟到,見到都係有一炸人喺度排隊買,連阿肥都覺得好驚奇,心諗一定係好東西,咁我哋都衝埋去排啦,阿肥了解完有咩食之後,佢叫咗一個原味牛角酥+一個酥皮鮮奶蛋撻。而我就揀咗特別啲嘅菠蘿牛角酥包+一個焦糖酥甩。 見個賣相都好吸引,滿心期待,第一口咬咗個菠蘿牛角包先,嗯......好普通咋喎,菠蘿皮唔脆,牛角包唔酥亦唔香......仲要$18蚊一個...有啲貴喎... 食完個淡味再試下個焦糖酥甩,反而我鍾意呢個多啲,個皮比較酥化,焦糖味都好重,個樣就係冬甩咁中間有個窿,不過都係細細粒就要$12蚊一個,本人就覺得係高檔嘅價錢,平民嘅味道喇。 而我見阿肥食完個牛角包,都一樣係失望嘅表情,到佢食個鮮奶撻嘅時候,仲見佢hold都hold唔住,爛鬼哂......但問佢味道如何,佢都話還可以嘅,但唔明白點解咁多人排隊買囉