隱日本料理 (Closed)

到訪呢間2019年已經開業嘅餐廳。我同朋友大約晚上7點黎到，全間餐廳只有我同朋友兩個人。心裡面多少有啲覺得奇怪，但仍然照坐低。睇一睇餐牌，價錢同地理位置一樣非常高級。當晚，我哋叫咗兩份龍蝦同飛驒牛嘅鐵板燒餐。食物質素嚟講，食材係貴價，選用澳洲南龍蝦同日本飛驒牛，食物都非常新鮮。龍蝦肉質彈壓。牛肉方面，我地選擇一份西冷同薄燒牛肉。西冷五成熟，肉質紮實，唔鞋口，但就太油。薄燒牛肉裡面包住蒜同蔥，不會食落唔夠香。擺盤都算精美。但整體黎講冇咩驚喜，而且整個套餐食落嚟，覺得好油膩。飽腹感有八成，但當中有兩至三成係因為太油，所以覺得好滯。最後個甜品亦係最失望，只係俾咗幾舊蜜瓜同埋哈密瓜加幾粒藍莓。說實話，比得一個相對高嘅價錢，餐廳係咪應該提供返一啲自家製嘅甜品搭配時令生果？如果只係需要普通果盤，我去酒樓食都有啦。呢個位我覺得完全唔配合食物嘅價錢同餐廳嘅地理位置。餐廳嘅廚師表示佢地有落廣告，請傳媒宣傳餐廳。但整晚都係得我同朋友，及另一枱情侶客人。如果真係想出奇制勝，餐廳要考慮一下調整個餐嘅搭配，先對得住比呢個價錢嘅客人。如無意外，應該唔會再翻轉頭食第二次。