金記冰室 (Closed)

金記係灣仔開咗咁耐，今日係第一次食，等咗一陣位就有喇，入去見到有飯有意粉，即刻諗起某個飲食節目講唔同地方既便當，有一集訪問藝人冰室，問過冰室同茶餐廳分別，老闆話以前只係有冰室，而且只會提供簡單食物，而唔會有意粉同飯，後期D人覺得冰室唔夠多選擇，所以出現茶餐廳，會有飯同意粉，所以分別就係呢樣。入正題，本來想叫個招牌餐既沙爹牛肉麵，但係賣晒，咁唯有加多$7叫個午餐D(咖哩雞扒煎蛋飯+羅宋湯) , 同事叫咗個午餐C(燒汁豬扒司華力腸飯+中湯).同事話佢個餐OK. 我個餐既羅宋湯都幾好，夠味同少少辣，不過就得兩片仔菜，而個咖哩雞扒煎蛋飯，煎蛋係荷包蛋，我最愛半熟蛋既蛋黃, 有兩小塊雞扒，大約係雞翼去骨再片開蝴蝶雙飛咁大塊，仲有三粒薯仔，雞扒煎得外脆內軟，咖哩夠香而且唔太辣，適合普羅大眾。整體合格，只係對於我呢D打工仔黎講有點貴。