醉吾串

Open Now

Now Closed

今日約咗朋友去做運動，做之前想食少少嘢，見到呢度有間日式串燒，舖仔細細，幾有特色。我哋試咗佢個雞心，雞肝同埋雞腎。原本我都好驚食雞心會有啲奇怪嘅味道，但係原來佢個口感都幾特別，偏向帶點爽脆嘅口感。而雞肝都幾香，識落嘅口感都有啲似食鵝肝，粉粉地。個雞腎都唔錯，唔會燒到太乾。另外我哋仲叫咗串雞翼，雞翼都係燒到啱啱好，啲肉都仲夠嫩滑，如果個皮再燒得脆啲就更加正。另外我哋仲試咗雞腿肉，雞柳同埋雞皮。雞皮都嫌佢有啲唔係好夠脆同乾身。而雞腿肉塊雞皮就夠晒乾身，但係中間雞腿肉嘅位置就好似唔係好夠熟，有啲難咬。最特別嘅個雞柳，一見到佢有啲粉粉地，一開始都唔敢食。不過職員行埋你同我哋講雞柳係咁樣嘅，因為如果全熟嘅話會好鞋，我哋食完都覺得原來真係啱啱好。呢度值得讚嘅係佢個黑松露薯條，真係有一片片嘅黑松露喺面，黑松露好香，薯條都好香脆。飲品方面我就叫咗杯Oreo沙冰，佢呢個沙冰應該係Oreo打碎左再加奶，因為沙冰嘅關係佢唔會太甜。而朋友就叫做杯菠蘿沙冰，不過佢話呢度嘅菠蘿沙冰係用罐頭菠蘿，所以還好。