亞谷特蘭州牛肉麵

Open Now

Now Closed

昨日約咗人喺天后地鐵站交收貨品，行過少少，有間鋪頭嘅招牌燈箱好閃，寫住食蘭州牛肉麵，咁就吸引咗我入去幫襯 。店內窄長設計，光亮清雅，簡單舒服。我當然揀傳統蘭州牛肉麵，係招牌菜式，加麵底無需加錢，大食嘅我梗係要加喇！麵嘅種類有六款任揀，我就試韮葉配中辣。韮葉嘅質地及款式似台灣關廟麵，好幼滑；牛展夠爽脆彈牙，中辣湯底可以接受，並非太辣，配埋一隻鹵蛋，夠晒飽。跟餐我要咗杯少甜少冰嘅鴛鴦，可以解吓辣，一流。阿女喜歡煙韌口感，叫咗個胡同兒炸醬麵配蕎麥稜，麵質符合預期，有咬口，吸滿豬肉碎、香菇及豆腐粒嘅醬汁，味道豐富有層次，不過，如果鹹味略為減少，就更加理想。特色小食必定推介係燒羊肉串 ，一碟有三串，醃料豐富，火喉十足，令羊肉非常入味，冇羶味，鮮嫩可口，好受歡迎 。西北肘花即係切片豬手，有啲似薰蹄做法，肉質結實彈牙，凍食好過癮，配埋青瓜絲，好爽口。仲有一碟涼拌薑汁蓮藕，微酸但清爽嘅藕片，開胃清甜。餐廳不設加一，下次再支持其他麵食，以示支持。