韓宮 (Closed)

放工約埋朋友食個韓餐，太耐無見，又太耐無食韓式燒肉喇！.雖然舖頭細細，但係韓國菜基本款式都有，我地仲叫左隻醬油蟹食添！$198一隻醬油蟹，配埋個紫菜飯，又唔算太貴喎👍🏻依度嘅醬油蟹係韓國老闆娘自己醃製，唔會死咸，仲食到蟹肉嘅鮮味。蟹膏撈埋個紫菜飯真係一流呀！.兩個人食唔到太大set嘅燒肉，我地叫個豬肉二人set，包括有五花腩肉，辣醬五花腩肉同豬頸肉。五花腩肉可以燒耐少少，燒到迫出肥油，到油脂變香，再配合旁邊嘅泡菜食，味道剛好。辣醬五花腩肉有豆瓣醬嘅香，實在唔太辣，醃得剛好。仲可以配旁邊燒至拉絲嘅芝士食，又係另一享受。我地慢慢燒豬頸肉到爽脆，我地就係少叫份生菜去包肉食，不過配上芽菜都係不錯。仲有個燒雪耳都好正呀，爽脆爽脆.燒肉食到差不多，係時候食個水冷麵清新一下味蕾。我喜歡水冷麵加少少白醋，配上韓國嘅梨子切條一齊食，好清新，好解油膩。