鳥世一

Open Now

Now Closed

今日係上環呢頭搵到呢間隱世串燒鋪，佢入面座位唔多，但格局顯得呢度係隱世食店一樣，佢呢度主打雞嘅串燒，選用咗備長炭嚟燒，果然係打住世界第一嘅級數名號嚟做！我哋揀咗唔同雞嘅部位串燒嚟試，有呢個雞腎，燒得好爽口，唔洗點加配料，鹽燒已經好夠惹味，食得出係好新鮮。另外有呢個雞頸肉，啲雞肉好滑，一啲都唔會覺得肥膩。雞全翼賣相燒得好靚，真係睇得出師傅嘅功力，雞皮焦香，但內裡雞肉仲係好嫩滑，好多汁！仲有個免治雞肉，啲醬汁同蛋香撈埋一齊食簡直一流～除咗雞之外，我哋都仲有點咗呢個牛舌，呢個係我食過最好食嘅牛舌之一，入口有陣陣嘅牛香奶香味，好爽口，仲有配搭埋啲黑椒嘅調味！另外點咗個黑豚五花腩蘆筍卷，啲蘆筍吸收曬五花腩啲油香，食落又唔會太膩，呢個配搭好fresh！全晚重頭戲係點咗呢份網燒牛肉，份量好夠，絕對兩個人份量，配搭埋呢個原粒芥末同柚子胡椒嘅醬，好重牛香，一啲都唔鞋。另外個銀鱈魚都一定要試，燒得好香口，啲魚肉好嫩滑，配埋啲沙律醬，真係越食越開胃！我哋都有叫咗啲主食嚟配埋一齊食，點咗個滑蛋雞肉飯同稻庭烏冬嚟試，烏冬好滑個湯底都好新鮮，而個雞肉飯就蛋香一流！