心齋 (Moved) New Location

一貫中式齋鋪嘅格局，或者可以話偏向優雅嘅傳統素食館。今日同婆婆慶祝生日，嚟到生平好少踏足嘅半山區。雖然唔係地鐵會到嘅地方，但比想像中方便，一家四口係金鐘搭的士，只需24蚊，錶都唔洗跳。介紹幾味印象深刻嘅菜式先，蟲草花萵筍浸鮮竹，呢幾樣都係我最鍾意嘅材料，煮出嚟好清甜，但一啲都唔淡，食到停唔到，最後連湯都飲埋！石鍋胡椒焗白菌，本身幻想係芝士白汁，可能被焗呢個字誤導咗，真身係好似上圖咁。唔好見佢清清地，其實非常香口，胡椒味好重，怕辣嘅唔好叫。原隻榆耳，心齋招牌（？）。我係出面無見過，睇餐牌介紹係一種好珍貴嘅菌類，食落爽口有酸味，有少少似食爽嘅黃耳？唔識形容，未食過我推薦叫嚟試下，一碟只係手掌咁大，唔怕食唔哂浪費。總結，呢度嘅菜式比起外面食嘅齋淡，唔會食完口乾，但又唔會好似粗茶淡飯咁食而無味，係素食市場的中間路線。