點.魚 (Closed)

今日出開中環，見到有間食四川野嘅新餐廳，門面裝修都幾靚，於是入去試吓。佢地晚餐有套餐，我地叫咗1 set 2人餐試吓，呢個2人餐都幾多野食。麻辣小餡餅，外層炸得好酥脆，雖然係炸，但唔太油膩，幾特別，好味。酸菜支竹，呢個係涼拌，甜甜酸酸，好開胃。尖椒四川皮蛋，呢款好有四川特色，唔係普通皮蛋，係金皮蛋，個醬汁辣得黎好香。招牌酸菜魚，條魚係炸咗之後先放湯再煮，所以食落仲有香脆口感，魚肉好厚身，都幾大條，個湯酸酸辣辣好惹味，仲有唔炒配菜喺入面，有我最愛嘅薯粉，煙煙韌韌，吸晒湯嘅味道，正。麻香豆腐血旺，豬紅好入味，豆腐吸晒d麻辣香味，唔錯。芒果涷布丁，呢個甜品勁多芒果肉，非常足料，唔太甜。四川冰粉，食落非常冰涼，d冰粉好滑，唔太甜，好味。