ZENTRO (Closed)

餐廳提供食物嘅種類都幾多，未食飯嘅可以食佢哋做到夜晚八點嘅午市套餐，食咗飯嘅朋友就可以試吓佢哋嘅串燒同埋嘢飲。我哋就叫咗兩個餐同埋幾款小食。沙律、西式餐湯和麵豉湯 — 呢啲都係跟餐附送嘅，雖然係餐湯，但係做得一啲都唔馬虎，上面落咗薄薄一層黑松露油，味道唔錯，沙律亦都新鮮。鮮魷魚一夜干— 店員推介嘅自家製菜式，用一款傳統一夜干嘅製法，令魷魚嘅鮮味更突出，平時出街都唔係成日見，值得一試。牛脷薄切、雞軟骨、雞腎串燒— 呢啲全部都係即叫即燒,重點係依度嘅燒物全部都係用上備長炭，有別於傳統嘅爐。溫泉蛋黑豚肉生薑燒飯定食— 好有日本風味，加隻溫泉蛋令碗飯無咁乾之餘，仲鐘意佢用上新鮮嘅鴻喜菇，好好食！！鮮蜆魚湯稻庭烏冬— 依排食嘅嘢都較為熱氣，所以決定叫個清淡少少，不過竟然都有驚喜，魚湯好清甜，而且仲有好多蜆啊！整體來講好滿意餐廳嘅水準，價錢亦都係同區餐廳來講算抵食，喺中環收工同同事上嚟食下野，聽下音樂就啱晒。