Sodam Chicken (Closed)

放假同老公再次出動覓食，上次Sodam Chicken銅鑼灣食得好滋味，今次同老公去另一中環分店食韓雞！Sodam Chicken中環店好近地鐵站，沿雲咸街上斜五分鐘就到。店舖樓高兩層，裝潢設計成酒吧格局，餐桌用左吧檯高腳椅，甚有格調。今次揀咗個2人滋味套餐，再加多份番茄沙律、炸紫菜卷併洋蔥圈。先講番飲品，青蘋果同熱情果特飲，都有添加少量梳打水，配上一串橡皮軟糖，點綴左特飲嘅色彩。黃金鹹蛋炸雞：鹹蛋黃醬黏住雞塊外層，炸得金黃香脆，內裏雞肉嫩滑，同時加左少量芝士脆片做伴碟，大大增強口感。至於蜜糖及芥末醬混合做炸雞醬汁更加係絕配，甜甜地又帶有點微辣，值得推薦！紫菜薯條：薯條係用上原隻薯仔制成，薯條外脆內軟，表面灑上大量紫菜碎，真係食到唔停口!水冷麵：麵件爽口彈牙，以泡菜、青瓜絲及雞蛋作伴菜，充滿田園風味，亦有助消除炸物嘅油膩感！炸紫菜卷併洋蔥圈：脆卜卜嘅炸洋蔥或炸紫菜配煙靭嘅粉絲，再加上韓式辣醬，真係好惹味番茄沙律：簡單而清新的頭盤，令人食慾大增。如吃過炸雞後再食番茄沙律，亦可減去油膩感。