粵藝館 (時代廣場)

Open Now

Now Closed

兩個人食中菜其實真係好難點嘢食，呢間餐廳好就好在佢嘅份量二人食都唔會太多，兩個人可以點多幾個餸，醉鮑魚一個匙羹一隻，酒香濃郁，擺盤精緻。軟殼蟹蟹蓋沙律，一個餸可以食到兩個口味，蟹蓋非常足料啖啖蟹肉。最喜歡都係呢度最受歡迎嘅乳豬，可以叫例牌每碟6舊，唔使好似出邊啲餐廳下下要食乳豬最少都要點半隻，實在太大份，呢間啲乳豬超級好食，外皮極度香脆，豬味香濃， 肥瘦比例啱啱好，配埋醬汁十分惹味。食中菜我慣咗一定要飲湯，呢碗花膠燉螺頭湯，好鮮甜而且個湯一啲都唔油膩，冇味精超級足料。雖然已經飲咗花膠湯，因為我隔離呢位人仔同我一樣鍾意食花膠，所以點多份扒花膠，大家都可以食得滿足，扒花膠筒比起湯花膠有兩個唔同口感，扒花膠口感更滿足，每一啖都充滿左膠質。唔止小朋友，我都好鐘意食咕嚕肉，但呢度嘅咕嚕肉係用西班牙豬嚟整，食入口特別鬆軟，酸酸甜甜好味道。生菜煲一打開個蓋已經好濃蝦膏味，而且侍應新鮮幫你炒起後，熱辣辣即刻食，食得多肉點都要食返啲菜平衡下，今餐真係非常滿足。