Oldish (Closed)

星期六chill chill，又黎觀塘工廈覓食，巧明大廈的升降機真係好舊式，不過有位伯伯幫手控制，順利黎到oldish餐廳。一入去就感覺到佢的風格，好多木的傢私，有啲舊有啲古典味，都幾有心思。枱櫈都係木，睇就好有特色，坐就麻麻地舒服。但整體環境幾有feel。最得意的係枱面上裝糖的器皿係非常中式，都幾大contrast，又中又西。食物都係西式，但有自助沙律吧，都幾多野揀，有沙律菜、粟米、薯仔、麵包糠，仲有cereal添，不過冇奶。醬汁有芝麻醬、千島醬，小型沙律吧黎講算幾唔錯。Lunch set仲包湯，係蘑菇湯，味道唔錯，但賣相一般，用中國碗裝住有啲奇怪，質感亦略嫌太杰，但好夠菇味。主菜全日早餐！都好豐富，炒蛋、煙三文魚、腸、菇、焗豆、麵包都好食，麵包好香，甜甜地，好鬆軟但好細個。腸份量幾大，但幾juicy。可惜，煙肉好dry，薯餅亦唔太新鮮，整體只屬一般。飲品加錢叫左cappuccino，好大杯，而且幾好飲，咖啡味濃，咖啡同奶比例亦啱啱好，唔錯！工廈餐廳黎講，裝修幾有特色，好有風格，食物就average，不過不失，係同朋友聚腳的好地方，咁的價錢包湯、沙律吧、主菜又有野飲，算幾抵食。