紅橋 (Closed)

旺角，一個集飲食同購物於一身嘅地方，有平民亦都有高檔嘅鋪頭，難怪無論平日定假日都咁旺。係旺角行完街之後，見到依間餐廳類似港式茶餐廳，但係又有西餐食，感覺幾新鮮，而且價錢親民，唔洗加一，環境又舒適，一於入黎試下。晚市有套餐，亦都可以散叫，叫咗套餐黑松露忌廉汁海蝦帶子燴意粉($72)，而家人就叫咗牛油醬意式卡邦尼意粉($68)。餐湯有中有西，老火湯料多又唔肥膩，栗米湯濃郁清甜。沙律係蟹籽青瓜，清爽又開胃。主角海蝦帶子意粉，賣相可以媲美正宗西餐廳，份量多，蝦同帶子有好多舊，咬一啖鮮甜入口，意粉質地爽，忌廉汁均勻，加上黑松露令成碟意粉好滋味。卡邦尼意粉嘅溫泉蛋煮得剛剛好，啖啖都食得出蛋香。我地仲單叫咗法式芝麻蝦多士($45)，有4件，分別係白芝麻同黑芝麻，炸得好脆，蝦打得好實好厚，加上炸過嘅芝麻就更香口。燒牛舌伴薑汁醬油($45)，肉質較軟，略厭燒得未夠香。最後要咗經典紅豆冰(另加$10)，紅豆又多又腍。檸樂(另加$6)，估唔到係玻璃樽可樂，身為可樂迷嘅我一定要讚依間餐廳對食物嘅要求。值得一讚嘅係，侍應態度良好又有禮貌，一定會再黎食~