街坊Cafe (Closed)

通菜街有唔少種類嘅餐廳，今次終於有機會黎街坊café試下。餐廳幾闊落，而且裝修得好別緻，係畫上麥兜嘅公仔。我同朋友點咗新出嘅原隻波士頓龍蝦2人餐($298)，份量非常多，我地都食唔哂。湯方面我地點咗素鮑參碗仔翅窩，同平時嘅碗仔翅唔同嘅地方就係，佢嘅材料非常足，有一條完整嘅海參同飽魚，而且湯比較濃味同黏身。主菜有原隻波士頓龍蝦芝士龍蝦汁意大利飯，總共有2隻完整嘅龍蝦，仲好貼心咁提供咗剪刀，龍蝦非常鮮甜同有肉感，仲有蝦、蜆、青口、魚子等等嘅海鮮，配上濃郁嘅芝士龍蝦汁，令到意大利飯十分可口入味。黑松露忌廉汁雞肉意粉，同平時嘅意粉差唔多，不過中意佢忌廉味唔會太重，一啲都唔膩。甜品係tiramisu吉士法國西多士伴雪糕，第一次食依種甜品。西多士係tiramisu味，配有吉士、爆谷同雪糕。西士多脆脆地又唔油膩，而爆谷沾上吉士又有另一番口感，甜到入心窩！兩杯飲品都揀咗蝶戀花系列，分別係一加一(芒果菠蘿)同埋櫻花樹下(櫻花士多啤梨)。賣相一流，果味宜人，而且蝶戀花夠哂健康。