亞越泰 (Closed)

去到石門其實餐廳都算多選擇，晚飯時間諗住去新陳根記懷緬一番，點知出面已經排左超過三十人，我地一行四人見都唔係好肚餓就過左隔離哩間唔知係越南定泰國野坐底叫少少醫肚算。餐廳晚飯時間都算多人，我地被安排坐於卡位都算坐得舒服。小食蒜蓉包，搽左少量蒜油，份量四小件。貌似餐湯送嘅法包多過我俾錢散叫既小食。香茅雞翼，份量算大，有大約八大隻，都夠熱夠香脆。香茅豬扒飯，煎蛋應該一早已經預備好夾落去，豬扒乾而不香口，唯有配上大量香蔥蒜提升味覺同口感。飯係熱既。蒜蓉炒芥蘭，賣相色澤ok, 亦夠熱同夠鑊氣，唯份量超少，我諗得十條八條菜。咖喱牛腩農夫包(小)，哩個竟然ok, 牛腩淰滑送你幾舊根，咖哩唔辣但都算幾香。細size一齊分享都夠食。總結晚餐黎講環境係有啲頹，似返工返學食lunch咁。其實哩種定位唔知係泰定越餐廳通常會中伏，不過佢又唔係難食的。只要記住佢係茶餐廳價錢，亦提供到茶餐廳質素，童叟無欺唔會有驚喜。