功夫點心 (Closed)

可能細個或工作成日都飲茶，所以搞搞下變左唔多鐘意，食飯...有太多選擇嘛！今日破例主動約朋友來吃點心，是要還飯債(雖然最後朋友點都要夾番錢)！位於尖少咀中港城二樓平台既功夫點心，還以為會有好多人到來歎一盅兩件，點知啲吉枱多到冇朋友，近乎想坐邊都得，怪不得我地遲到都冇人催啦！餐廳地方尚算寬敞，可能樓底較低，所以沒有裝假天花遮住啲喉，牆上既燈幾靚，點心紙設計都幾特別，個封面成本秘笈咁，貫徹功夫既主題。點心好大路，叉燒包﹑麻茸包﹑原個馬拉糕﹑逐粒叫既蝦餃燒賣(2件起)﹑鳳爪(有柱候醬及鮑汁揀)﹑各式腸粉等，亦有煲仔飯，飯夠乾身，我地點既排骨冇肥肉，味道不錯！較有特色既點心冇乜，但有少人整既煎糯米雞﹑蝦春卷。其中後者好味！4個人叫左差不多20碟點心，埋單$480有找，唔算好貴。食物未至於話超得，但好味過深水埗名店呀！有茶癮想夜晚食點心既都唔錯既，食完仲可以過隔離搭夜船過大海添呀！