番茄18

Open Now

Now Closed

今日早放，約咗朋友一齊去荃灣覓食，大壩街一向喺荃灣食嘢多嘅地方，最近都開咗好多新餐廳，作為荃灣人嘅我，梗係會來覓食呀，記得同事推介，話鍾意食蕃茄湯/麻辣湯米線及瑞士汁雞髀就肯定要幫襯蕃茄18，咁今日就一於入來試一試啦！入到去，侍應俾咗個窗口位我，坐得舒服，隨即奉上暖水一杯，好貼心。瑞士汁雞髀選用頭抽瑞士汁豉油，再加八角、桂皮等多種香料調校而成，甜到適中，有陣陣香料味，層次豐富。雞髀近骨的位置略為切開，令雞肉更易吸收瑞士汁的味道。頭抽瑞士汁雞髀肉質嫩滑，肉汁豐富，絕非一般！朋友叫咗個藥膳雞湯米線，湯底濃郁，用料紮實，眼見到嘅藥材有沙參、玉竹、圓肉、淮山、杞子⋯⋯淨係睇吓都覺得好養生啦，何況仲要食埋落肚！水煮豚肉米線轉薯粉，好大碗，香香辣辣，薯粉煙靭，豚肉爽滑，最啱鍾意食辣辣辣嘅你，食完好滿足。特飲菠蘿冰，第一次見有得嗌走甜，最適合食完肥膩嘢之後飲，佢真係用新鮮菠蘿整嘅，飲完即刻消滯！大壩街咁多特色小店，唔係有返兩度散手啊，又點可能屹立於此！