嘉頓咖啡店

Open Now

Now Closed

之前睇過飲食情報，話深水埗嘉頓有雞批食，經開深水埗睇電腦野，初時驚假日唔開，不過行到附近就行上去睇下啦！好彩都有開，行入去會見到所有嘉頓產品，相對係大型超市賣既平少少，行入d仲有個微型博物館，睇番以前有d產品。行完一輪，坐低食野，佢有新鮮出爐既提子玉桂卷、椰撻，呢d可以散叫，至於蛋糕同餡餅如雞批就要叫套餐先得，反正都係坐低食，叫左個雞批+咖啡，雖然唔係即製，不過佢都會即刻焗番熱，所以都要等一陣先有。有得食勒，雖然係紙碟裝住，不過有張勁classic既通花墊紙，好有細個去茶餐廳食蛋撻、雞批既回憶，真係焗到熱辣辣，隊長掂一掂個錫紙兜都真係辣手，雞批個面係甜甜地既，雖然個批唔算好脹，不過個撻皮都厚薄適中，裡面都算幾多餡，而家呢種港式雞批真係買少見少勒～咖啡我有少少surprise既，我初時以為是但比杯三合一咖啡你，原來都叫做比杯即磨咖啡你，仲要比兜奶你自己落，雖然唔係咩靚咖啡，但都尚算有d誠意。唔鍾意食咸味餡餅，可以試下蛋糕，睇住個舊式旋轉蛋糕櫃放滿蛋糕，真係好吸引，即刻諗番起細個會望住蛋糕櫃既蛋糕係甘轉，望到唔捨得走。