越南麵包

Open Now

Now Closed

九龍城有咩好野食? 好多人一諗就諗起泰國野。其實邊個話呢度只係有泰國野食架? 除左泰國野，九龍城仲有好多出名既小店添。位於九龍城龍崗道既越南麵包，主打越式三文治，可能因為天雨關係，星期五晚飯時段都唔算好多人，未需要等位。餐牌上有各式各樣既越式三文治同埋小食。我地一行二人，揀左兩款唔同既三文治同埋一個小食。烤豬肉紙卷:米紙卷入面包左炸豬肉，青瓜，蘿蔔絲同粉絲，材料新鮮，入口相當清爽，點埋D汁一齊食，入口酸酸甜甜咁都幾開胃。可惜包得唔夠實，食起上黎有D狼狽。咖哩雞麵包: 法包烘過之後外脆內軟，切開後加入咖哩雞，上面加少少洋蔥即成，做法似係好簡單，利潤都算幾深。咖哩既辣度可以自行選擇，我地今次揀左小辣，咖哩味非常香濃，辣度剛剛好，落單既時候仲可以要求店員切開幾多件，真係服侍周到呀。法式油封鴨脾麵包 （低溫慢煮十小時) :鴨脾慢煮十個鐘之後肉質鮮美嫩滑，放入烘好既麵包入面，加埋洋蔥，生菜同埋沙律醬，賣相相當吸引，入口一D都唔油膩，值得一讚。呢度環境同服務都唔錯，食完都唔會趕人走，係同朋友傾計既好地方。