隼 (Closed)

今晚去咗Megabox，搵到呢間餐廳以鐵路為主題嘅壽司店，見佢裝修咁得意，就決定入去試下。首先叫咗吞拿魚腩盛，有海膽醬炙燒赤身壽司、吞拿魚腩壽司、赤身壽司、蔥吞拿魚腩軍艦。赤身夠曬肥美，炙燒之後嘅味道更突出，加咗海膽醬味道好特別。吞拿魚腩壽司嘅油脂分佈平均，入口即溶；蔥吞拿魚腩軍艦好彈牙，又鮮甜。我哋仲試咗餐廳新推出嘅特盛大滿足，三文魚好鮮嫩；帆立貝好大粒；劍魚腩油脂豐富。油甘魚滑身但唔油膩；黑松露赤蝦好香濃嘅黑松露香令鮮味更突出。珍寶蟹棒大大條又厚身又好肉，真係食到好滿足。 我哋另外再叫多咗幾多款壽司同小食，原條炙燒穴子，燒過之後將啲油份迫曬出嚟，成條穴子即刻變得好滑。蒜蓉牛油燒珍寶帆立貝好大粒，燒完仲加咗蒜調味，聞到流曬口水。多春魚，燒完熱辣辣，好香口。三色井有蔥吞拿魚腩嘅鮮味，加上鹹鹹地嘅三文魚子同辣味三文魚，帶出唔同層次嘅味覺享受。最後有少少口痕，叫多個忌廉蟹肉薯餅，好香脆而且忌廉好creamy，食得出佢啱啱炸起。