匠心廚房 (Closed)

依間由5星級酒店大廚主理嘅中菜，最近由美孚搬咗去尖沙咀，主要以粵菜同京川滬菜為主。鮮茄魚湯龍躉球有得揀酸辣同走辣，配菜有酸菜、金菇、粉絲等，加埋蕃茄湯，酸味醒神非常開胃。龍躉球嫩滑結實，連埋豐富膠質嘅龍躉皮，魚味好濃郁。蒜芯醬爆花甲肉蒜芯非常之柔嫩，完全冇渣。花甲肉唔連殼，啱晒我依啲嫌麻煩嘅人，可以每次大啖大啖咁放入口，配合埋XO醬，香辣惹味，送飯一流。籠仔排骨蒸陳村粉將排骨放喺陳村粉上面蒸，排骨非常軟腍入味，而陳村粉吸收晒排骨嘅精華同蒜茸汁，味道非常豐富。更以荷葉墊底，透出淡淡荷葉清香。