紅蔥頭

Open Now

Now Closed

早兩日有兩個朋友仔約我呢個中佬食晏晝飯。我就喺美孚做完嘢，晏晝就要去大埔區而佢哋就響會展，晏晝分別要去屯門同埋馬鞍山。我哋不約而同都諗起餐廳最好嘅地點，就係交通極之方便嘅紅磡。今次食嘅餐廳就係位於紅磡置富都會嘅「紅蔥頭」嘞，即係火車站隔離果個商場呀。我諗近年有去過紅館睇演唱會嘅觀眾當中，都有好多人幫襯過呢間餐廳，因為佢性價比夠哂高嘛。講番今次先，我兩個朋友都叫咗「廚之推介」嘅午餐。一份係「白菌牛扒配薯菜」，另一份係「蒜蓉雞扒配白飯」。兩份都會包埋「是日歐陸濃湯」、「牛油法包」。而我就嗌咗一份「烤美國安格斯漢堡伴炸薯條」。講番啲嘢食，其實都幾有質素。牛扒唔會靭，有肉香。雞扒更加係煎得好香。漢堡配料做到足，唔係粗製濫造之作。飲品方面，我哋叫咗三杯凍飲，包括玫瑰花茶熱情果、士多啤梨橙汁同埋芒果橙汁。三杯都重果味，唔會太甜，夏天飲真係透心涼呀！