Video
Read full review
2013-06-09
114 views
有幸被邀請來到凡高廚房試食，不論是梵高畫家，或是凡高餐廳都久仰大名，今次可以相約老友食家一起去 '撐檯腳'，真是又開心又期待。凡高廚房位於軒尼詩道，在灣仔消防局旁，由銅鑼灣地鐵站行去也很方便。餐廳位於該大廈的二樓，門口已是充滿歐陸色彩嘅設計，以紅磚牆紙襯托，掛著凡高其中一幅代表作《星夜》的仿製油畫，感覺就好似置身係藝術館咁。餐廳內紅色的牆，配白色的櫈，一幅又一幅嘅梵高著作，例如夜晚露天咖啡座 (Cafe Terrace at Night)，星夜 (The Starry Night)，羅納河上的星夜 (Starry Night Over the Rhone)，夜間咖啡館 (The Night Cafe in the Place Lamartine in Arles) 等等，都係老闆 Vincent 自己搜集回來的。另外餐廳內亦有各式各樣的小擺設，而最引人注意的莫過於歐陸式小鞦韆和那張桌球檯，而桌球檯也可以按需要時變身成餐檯，增加客人可以用餐嘅地方。今晚餐廳為我們二人安排咗 '時令限定' 嘅 '頂級羊架海鮮拼盤套餐' 內嘅 '2人海鮮和羊餐'，只係睇嗰名嘅已經好吸引。餐牌內除了介紹不同嘅食
凡高廚房位於軒尼詩道，在灣仔消防局旁，由銅鑼灣地鐵站行去也很方便。餐廳位於該大廈的二樓，門口已是充滿歐陸色彩嘅設計，以紅磚牆紙襯托，掛著凡高其中一幅代表作《星夜》的仿製油畫，感覺就好似置身係藝術館咁。
餐廳內紅色的牆，配白色的櫈，一幅又一幅嘅梵高著作，例如夜晚露天咖啡座 (Cafe Terrace at Night)，星夜 (The Starry Night)，羅納河上的星夜 (Starry Night Over the Rhone)，夜間咖啡館 (The Night Cafe in the Place Lamartine in Arles) 等等，都係老闆 Vincent 自己搜集回來的。另外餐廳內亦有各式各樣的小擺設，而最引人注意的莫過於歐陸式小鞦韆和那張桌球檯，而桌球檯也可以按需要時變身成餐檯，增加客人可以用餐嘅地方。今晚餐廳為我們二人安排咗 '時令限定' 嘅 '頂級羊架海鮮拼盤套餐' 內嘅 '2人海鮮和羊餐'，只係睇嗰名嘅已經好吸引。餐牌內除了介紹不同嘅食物和飲品，亦有凡高廚房嘅資料介紹。不過最令人印象深刻嘅係呢度有 'KID's Menu'，同樣有前菜，湯，主菜和甜品。
'2人海鮮和羊餐' 係包紅酒，白酒或是日特飲，由於我們兩個都不好酒，最後我選擇了洋甘菊花茶，因為見到餐牌上寫佢有促進消化嘅功能，哈哈，由於星期四要特別早起，平時星期三晚盡量避免外出用膳，今晚食得咁豐富，更加要好好消化才可以入睡。洋甘菊花茶是一壺盛上的，餐廳職員提示加入熱水後要先泡一會，泡浸期間，茶色漸深，淺黃色的洋甘菊，有淡淡嘅芳香，入口甜中帶甘，啱我口味。
餐廳職員先奉上餐前小吃，估不到原來麵包條和蒜頭都可以做得咁別緻，麵包條遠看像炸薯條，Handmade 麵包夠香脆，而半個呈花形狀的煎炸蒜頭，食落就很鮮甜，真係幾好味。配埋黑松露橄欖油，將麵包配蒜頭變身成一個出得廳堂嘅小食，很有心思。
跟住就到前菜，係 2 人份量嘅海鮮拼盤！嘩嘩嘩！2 人份量都咁豐富，有半隻法國睡蟹， 2 隻加拿大翡翠螺，6 隻法國藍青口，４隻新鮮大虎蝦，２隻時令生蠔，真係睇見都開心。為咗保持新鮮度，海鮮拼盤用冰盛著，有點似迷你自助餐海鮮桌。
法國睡蟹因為平時係深海太 '懶'，無咩點運動，所以滿身都有蟹膏，味道甘香濃郁，而蟹肉鮮甜，好正呀！因為老友食家唔食蠔，所以我就食埋佢嗰份，生蠔不是大大隻的品種，但係味道鮮甜，肉質嫩滑，真係唔錯，好想食多幾隻，哈哈。最令我欣賞嘅係法國藍青口，平時因為覺得藍青口唔多好食，已經好少食，估唔到原來藍青口都可以咁好食。藍青口很新鮮清甜，肉質比平時食的鮮嫩得多，好正呀！至於虎蝦同翡翠螺，食落也很新鮮，彈牙爽口，不過我太鍾意睡蟹，生蠔和藍青口，所以有點被比下去呢。
接著就是凱撒沙律伴煙三文魚，沙律菜新鮮爽脆，沙律醬和芝士的份量合我心意，因為自己不太喜歡醬汁和太多芝味，而煙三文魚味道適中，最怕食到過鹹的。清新的沙律剛好為我們清一清味蕾。
之後餐廳職員奉上 98% 野菌忌廉湯，用上多種野菌嘅忌廉湯，散發出陣陣野菌味，味道香濃，質感濃郁，啖啖都係菌，添了松露油的忌廉湯，就更加香味撲鼻。再配上我至愛嘅牛油塗小麥餐包，好正！
我哋嘅主菜出場喇！招牌澳洲頂級和羊配蒜蓉香草醬薯角，和牛就聽得多，和羊都係第一次聽。原來澳洲和羊係澳洲頂級羊種，因為係用提煉紅酒中嘅葡萄渣餵飼，所以肉質纖維特別幼細嫩滑。今晚我們食嘅係羊架，羊架食落確係唔同，肉汁非常豐富，脂肪分佈平均。因為老友食家唔食得太生，我們要求八成熟，但肉質仍然鮮嫩，最重要係肉味不羶，招牌和羊果然係必食之選。大家亦可按個人喜好選出不同醬汁，其中更有用羊肉汁製成的醬汁，啱晒愛羊嘅朋友。而配菜有放在羊架底嘅鮮嫩蘆筍，清新嘅沙律菜，同埋香口惹味嘅薯角，食薯仔都沒有飽滯感覺真係第一次，香草醬薯角真係幾好食。
而另一個主菜就是時蘿香草燒英國野生原條龍脷魚伴忌廉意大利粉，大大條龍脷魚煎得金黃色，外脆內軟，魚肉嫩滑。而忌廉意大利粉食落也很彈牙，忌廉濃度適中不過濃，不怕會膩滯。最後就是甜品環節，套餐原是提供意式啤梨芝士餅，餐廳特意為我們準備焦糖燉蛋和心太軟。雖然已經食得好滿足，不過我們另一個胃仍然等待著要試甜品。焦糖燉蛋很香滑，焦糖味不太濃，不過反而合我心意，自己唔鍾意太甜。
心太軟配雲尼拿雪糕，再加上 Vah Gogh 名字，很有心思。心太軟用上 Dark Chocolate，甜中帶甘，切開後朱古力醬流出，配上香滑嘅雲尼拿雪糕，一熱一凍，一濃一淡，係最佳嘅配搭。本身此套餐還提供咖啡或茶，由於我哋已經非常滿足，所以沒有點了餐茶。總括而言，此 2 人套餐價值 $888，份量比平時食的意大利餐廳多，個人覺得單是海鮮同和羊已經物有所值。今晚真是環境和食物質素很好的一餐，除了我們之外，餐廳內還有四檯客人，而兩檯也是來慶祝生日的，生日蛋糕係大大個火焰雪山，真係幾吸引。如果下次想找一個特色地方同朋友慶祝，真係可以再嚟多試試。另外餐廳仍提供包場服務，有 Buffet 小食等提供，亦都可以配合唔同客人嘅需要。
去完凡高廚房，回家都做咗啲資料搜集，看看梵高的著作和故事，有點後悔上次去荷蘭嘅時候，沒有去參觀他的作品。不過最有趣嘅發現是原來凡高廚房老闆同梵高也是叫 Vincent，哈哈，他們真的有緣。
Post
