六小館

經常聽d朋友講話去東涌Shopping，又話係東涌Outlet買到好多平野，一直都心郁郁想去逛下，剛巧有假期就決定同埋媽媽去行下好多年都沒有踏足的東薈城。原來依家去東涌的交通極方便，一上巴士駛去屯赤隧道，大約用左20分鐘就到達東薈城，真係仲快過出荃灣。 到達東薈城，首先當然要醫飽個肚先有力氣去購物，同媽媽一齊就必然係飲茶，今次㨂了一間叫六小館的中餐廳。店舖係商場六樓，好好彩被安排坐的位置係對正落地大玻璃，沒有比太陽曬到正，但又天然光線充足，感覺十分良好。鮮蝦炒新竹米粉 – 鮮蝦極多，而且非常新鮮，米粉的份量也剛剛好，炒得很乾身，而味道也不太濃，絲毫沒有油膩感。紅米鮮蝦帶子腸粉 – 紅米腸粉內有脆卜卜的好似響鈴包住鮮蝦、帶子同脆肉瓜，餡料很多，口感十分豐富，真係邊食邊讚嘆，仲指定下次再光臨都一定要再食多一次。 蟹籽鮮蝦燒賣 – order完點心後，發現款款都有包含鮮蝦，但好彩d鮮蝦都好新鮮，食極都唔厭。燒賣都幾大粒，味道不錯。蘿蔔千絲酥 –外層酥脆，內餡夠哂熱辣辣，d蘿蔔絲蓉味道很濃郁，好好味。