京香閣 (Closed)

京香閣-京菜自助餐放題、韓燒、buffet一年都食唔少次，今次竟然比我係上環搵到間專食京菜既自助餐。又為食又貪新鮮既我，點會錯過覓食既機會。一坐低，服務員就極速送上每人一份原隻鮑魚花菇同砂窩花膠雞湯。鮑魚同花菇都好大隻,經過蠔油炆煮後,非常入味,鮑魚亦都夠腍身。至於砂窩花膠雞湯，完全飲得出湯既鮮甜，花膠非常厚身，入口除咗黏咀外，亦好爽口。另外，全場超過四十幾款冷熱菜式、甜品任食，而最得我歡心一定係酸辣湯、醬茶鴨同四喜烤夫，野食種類多到試唔晒。而重點中既重點，一定係京式片皮鴨，鴨胸皮脆肉嫩，油香滿溢，而餅皮用上牛油紙相隔，以防黏埋撕爛，而keep住用蒸籠熱住，入口熱辣辣質感煙韌。加埋京蔥、青瓜同京醬，超級好味！-仲未夠喉唔緊要，仲有即叫即做既點心同甜品，有我最愛既小籠包同炸饅頭。兩個鐘頭不停食無停口，完全覺得抵返晒。