金太陽美食快餐 (Closed)

呢間快餐店我已經幫襯咗幾年,最初見到餐牌真係嚇一跳,上環區竟然仲有廿幾蚊一個餐,而且仲要包埋湯或者飲品.雖然依家已經加價但點都係同區既平價之選.先講湯,店員成日讚啲湯真材實料,的確飲得出無加味精,而且見到大量湯渣.雖然味道略淡,但總比好多味濃但加味精嘅湯好.最重要係加兩蚊就可以將個湯加大,用大湯碗嚟裝,將碗湯同埋成碟飯擺埋一齊對比一下,就會知道份量有幾誇張.相信一個女仔飲完曬成碗湯已經唔使食嘢. 呢度嘅主打就切雞飯同埋咖哩牛腩飯.就算係熟客都要講,食物質素真係非常一般.切雞飯會有雞髀,雞肉唔算鞋,但係無乜雞味.咖哩牛腩/紅酒牛脷飯汁多肉少,而且越來越少,按年遞減,汁味太濃而唔辣.呢度嘅飯量非常多,無信心食晒嘅記住要求少飯.雖然依度缺點都幾多,單以味到嚟講,呢度只係僅僅符合合格水平.但以價錢嚟衡量依然係物超所值(少少啦)嘅.另外呢度嘅店員認得熟客㗎,有講有笑有人情味,見你熱會俾紙巾你抹汗,見你流鼻水都會問候下你,依類舊式快餐店係應該支持嘅