東記上海麵

Open Now

Now Closed

諗起豬扒麵，就會諗起大埔，諗起大埔，就會諗起豬扒麵。大概呢個就係我對東記豬扒麵嘅評價，由以前成日喺馬料水果邊出沒開始，就已經會專登過去大埔呢邊食豬扒麵，由開頭嘅一碗，好快就已經變成淨豬扒，再加淨麵。雖然係滯同埋油膩，但係非常非常滿足。嗰陣時仲係喺熟食中心嗰度食，近呢幾年就開咗地舖餐廳，自從開張咗之後，我就冇去到熟食市場嗰邊食喇，始終新舖呢邊有冷氣，又冇咁逼人，同埋唔使經過街市。講返啲豬扒，啲豬扒完全唔會好難去咬開，每啖咬落去嘅豬扒都會有肉汁同埋豬油流出嚟，其實啲炸雞翼都非常出色，但係奈何我真係得一個肚，真係食唔落咁多。同埋又唔想雙拼，搞到食少咗啲豬扒。淨麵方面，其實佢個作用唔大，純粹叫做有啲湯，有啲麵，食落去冇咁滯，不過記住唔好慳，一定要加錢落腩汁，真係好味好多㗎。