炎天丼 (Closed)

本來係朋友介紹去試嘅一間餐廳，但我第一次食完之後就愛上了，結果一去再去。一間好嘅餐廳唔單止食物質素要有保證，服務都好重要，而呢一間餐廳就正正將呢兩點做到滿分爆分為止。海鮮天丼 天婦羅炸到金黃色而且好足料，令人垂涎三尺。海鮮天婦羅要好食一定係因為食材新鮮，但最令人估唔到嘅係，就連佢既蔬菜天婦羅都十分之好食，店員仲同我哋推介食天婦羅既次序，務求令我哋有最高嘅享受！唔係講笑，我個人覺得依個烏冬冷麵比起丼飯更加好食，夏日炎炎嘅時候食一碗冷麵，配埋熱辣辣嘅天婦羅，it’s so balancing, so perfect!依碟海膽天婦羅係我哋特登嗌嘅，因為食完海鮮天丼之後覺得佢嘅食材真係唔錯，所以心思思想試埋佢嘅海膽。果然冇估錯，海膽天婦羅都係好好食，唔錯唔錯！你一定冇諗過係天婦羅專門店入面竟然有甜品食，但依碟香蕉天婦羅一鳴驚人，明明我哋已經食到好飽，但食左一啖後竟然好似打開咗第二個胃咁，狂轟落去無難度，天婦羅香脆鬆軟，配朱古力醬正呀！總括而言，餐廳既價錢平宜近人，食材新鮮份量多，而且真係好好食，服務質素頂級。就係咁簡單粗暴，完勝佢身邊既對手！