沙嗲王 (金馬倫道) (Closed)

朋友好鍾意食沙嗲王係都要拉我去食。小妹甚少食沙嗲王，對上一次食係喺佐敦恒豐中心嘅沙嗲王，但佢已經執咗N年，所以小妹對沙嗲王嘅印象依然停留係當年好多款咖喱，餐廳有海盗裝飾嘅嗰個沙嗲王。一坐低見到餐廳嘅環境已經同當年嘅沙嗲王唔一樣，餐牌亦見有新款食物。其中，依個麻辣青咖哩軟殻蟹米線配溏心蛋深深咁吸引住我。麻辣、咖哩、軟殼蟹，全部我都鍾意食，但麻辣加青咖哩個配搭又覺得好似伏伏地，但朋友大推所以就試下。食落真係唔錯，麻辣湯底加青咖哩汁居然好夾，食落好惹味。軟殻蟹大大隻，炸得好滋味。溏心蛋煮得剛好。成碗麵雖然會油咗少少但整體係好食的。招牌嘅白咖哩豬扒飯同樣都係好食，豬扒可能會有d細塊。白咖哩汁上有洋蔥絲、炸蒜，撈飯一流！