豊洲水産海鮮丼専門店 (Closed)

日本野真係食極都唔會厭，今次就揀咗呢間口碑幾好嘅日式水產專門店嚟食午餐～刺身拼盆有中拖羅、帆立貝、三文魚同埋油甘魚刺身，雖然份量唔多，但係每一件刺身都好鮨味。中拖羅、三文魚同油甘魚嘅魚味濃郁之餘，油脂味亦都好香，特別係中拖羅，入口即溶；而帆立貝更加係鮮甜嫩滑，就算唔點豉油調味，就咁食都已經好正～西京燒其實係指以西京麵豉醬(又稱白味噌)，作為主要醃料嘅燒物。三文魚嘅外皮燒到焦黑，而魚肉嘅表面就仍然維持粉嫩嘅橙色，當中帶少少焦紅色，賣相更加吸引。因為大部分嘅油脂已經嚮燒煮嘅過程中逼咗出嚟，所以食落一啲都唔油膩，肉質表面嫩滑，咬落口感結實唔會鬆散，濕度適中，味道甘甜鮮美，高質～雖然意式食法嘅風味比較豐富，但醬油同埋香蔥嘅味道太濃，將帆立貝嘅鮮味蓋過咗，已經食唔到帆立貝嘅鮮甜，所以我個人唔係咁鍾意呢種食法。雖則甜蝦食落肉質結實、口感嫩滑、味道甘甜，但38蚊4隻，其實唔算抵食～腦天即係吞拿魚頭頂嘅肉，一條吞拿魚可能只係得兩片，口感軟滑，筋少而脂肪多，魚味極濃，最啱刺身食用。 經過火灸之後，脂味更加突出，入口即溶，油香瞬間充滿咗成個口腔，令人一試難忘～