A.T.A.S

Open Now

Now Closed

去銅鑼灣做完body check，就喺附近嘅A.T.A.S食埋飯。雖然呢度係屬於自助式，但係環境寬敞，座位之間空間感十足，坐喺餐廳入面都好舒適。呢度主要係做星馬風味嘅菜式。叻沙材料包括有蝦、魚蛋、豆卜同洽蛋，用料十足，而且湯底辣得嚟夠晒香口。叻沙可以選擇唔同嘅麵條，而我就揀咗粗米粉，即係類似平時食開嘅米線。炸魚片米粉同樣用上粗米粉，再配上炸魚片、白菜、蕃茄，魚湯呈奶白色，滋潤得嚟又唔會腥。炸魚片仲配埋紫菜，朔晒湯勁好味。特別要推介佢哋嘅咖椰爆漿，總共有兩款口味，而我就揀咗花生醬配朱古力榛子醬，上面再灑上厚厚嘅美祿粉。入邊內藏一片牛油，再配埋朱古力榛子醬，真係人間美食。潮流興Black Pink，其實佢係玫瑰露仙草，少甜嘅味道都幾啱飲。而班蘭薏米水味道就更加清新，加入咗薏米令飲品有淡淡的米香。